පරිගණක විද්‍යාවේ ආගමනය

කොම්පියුටරය (Computer) හෙවත් අපේ භාෂාවෙන් හඳුන්වන පරිගණකය නැමැති යන්ත්‍රය අද වන විට නැතුවම බැරි දෙයක්. අතීතයේදී ‍පරිගණකය බිහි වීමට මුල් වූ පර්යේෂණ සිදු කරන විට පරිගණකය නැමැති යන්ත්‍රය මේ ලෝකය තුල මෙතරම් විප්ලවයක් සිදු කරයි කියා එවකට කිසිදු පුද්ගලයෙක් නොසිතන්නට ඇත. ඇත්තම කිව්වොත් ඔවුන් එම පර්යේෂණයන් වල නිරත වූයේ පරිගණකයක් නිර්මාණයට නොවේ. එහෙනම් ඔවුන් ඒ සඳහා තම කාලය හා ශ්‍රමය වැය කළේ කුමටද? ඒ පහසුවෙන් ගණනය කිරීම් කටයුතු සිදු කළ හැකි යන්ත්‍රයක් නිර්මාණය කරගැනීමටය.

එදිනෙදා භාවිතයට ගණිතය නැමැති විෂයය එකතු වීමත් සමඟ සෑම ක්‍රියාවකටම සහ සෑම දෙයකටම යම් වටිනාකමක් හෙවත් අගයක් දීමට මිනිසා පුරුදු විය. එම නිසා මනුෂ්‍ය වර්ගයාගේ ගැටලු නිරාකරණයට ගණිතයෙන් පිළිතුරු සෙවීමට පෙළඹිණි. ඒ හේතුවෙන් මෙම  අගයයන් ගණනය කිරීම ක්‍රම ක්‍රමයෙන් සංකීර්ණ විය. විටෙක එය සාමාන්‍ය මිනිස් බුද්ධියට දරාගත නොහැකි සංකීර්ණ විශාල ගැටලුය. ඉතින් මෙවැනි ගණනය කිරීමක් කෘත්‍රිම යන්ත්‍රයකට භාර දීමට මිනිස් බුද්ධිය සමත් වුණා. ඒ තමා පරිගණකයේ මුල් අවස්ථාව වන ගණක යන්ත්‍රය (Calculator). ඉතින් ගණක යන්ත්‍රය දිනෙන් දින සංකීර්ණ වෙන්න පටන් ගත්තා. එය තට්ටු ගණනක ගොඩනැගිල්ලක් තරමටම විශාල වුණා.

ට්‍රාන්සිස්ටරය නැමැති ඉලෙක්ට්‍රොනික උපාංගය සොයා ගැනීමත් සමඟ ප්‍රසාරණය වූ මෙම යන්ත්‍රය නැවත සංකෝචනය වෙන්නට පටන් ගත්තා. එසේ සංකෝචනය වෙලා අද ඔබේ ඔඩොක්කුව මතට (Laptop) පැමිණිලා තියෙනවා.  මෙසේ ඔබේ ඔඩොක්කුවට ලැප්ටොප් පරිගණකයක් විදිහටත් ඔබේ අත්ල මතට ස්මාට් දුරකථනයක්(Smart Phone) විදිහටත් එන්නට පෙර පරිගණකය විවිධ අවදි පසු කරමින් පැමිණියා. එහිදී එකතු වූ නවාංග ගණන අති විශාලයි.

ඔන්න ඔහොම ඉදිද්දී තමයි මේ සඳහා විද්‍යාවෙන් තවත් අනු විෂයයක් විදියට පරිගණක විද්‍යාව කරළියට පැමිණියේ. අද වන විට එය පුළුල් වූ විෂයයක් වගේම එයින් බිහි වූ ප්‍රජාවත් තාක්ෂණයත් නිර්මාණත් අති විශාලයි. විශ්ව විද්‍යාල මට්ටමටම අද එය පැමිණ තිබෙන්නේ ඒ නිසයි.  මෙම විෂයය අනෙක් විද්‍යා විෂයයන්ට වඩා ගණිතය සමඟ බද්ධව සිටිනවා. ඇත්තෙන්ම මෙහි පරිගණකය පිළිබඳව මුලික පදනම් කරුණු අධ්‍යයනය කරන විෂයයකි. සංඛ්‍යාන සිද්ධාන්ත , ඇල්ගෝරිතම් විශ්ලේෂණ , විධිමත් ක්‍රම , සංගමන ක්‍රම , දත්ත සමූදායන් , පරිගණක චිත්‍රක , වැඩසටහන්කරණය හා පද්ධති විශ්ලේණ වැනි වැනි ක්ෂේත්‍ර ඔස්සේ මෙම විෂයෙහි වැඩි දුර අධ්‍යයනය කෙරේ. ප්‍රධාන ව‍ශයෙන් මෙමඟින් මෘදුකාංග ඉංජිනේරුවෙකුට හොඳ අඩිතාලමක් දමනවා. 

තව දෙයක්! සමහරු පරිගණක විද්‍යාව සහ තොරතුරු තාක්ෂණය පටලවා ගන්නවා. පරිගණක විද්‍යාවේ දී සිදු කරන අධ්‍යනයන් ගැන මම කලින් කිව්වා. තොරතුරු තාක්ෂණය කියන්නේ පරිගණකයේ ආගමනයට පසුව බිහි වූ දෙයක්. මෙයට නූතන සන්නිවේදන තාක්ෂණයත් ඍජුවම බද්ධ වී තිබෙනවා. මෙමඟින් සිදු කරන්නේ තොරතුරු හුවමාරුවයි. නූතන සමාජයේදී තොරතුරු හෙවත් දැනුම කියන්නේ වටිනා සම්පතක්. ඉතින් මේ සම්පත සෑමදෙනෙකු අතරට යවන තාක්ෂණික ක්‍රමවේදයන්ට අපි තොරතුරු තාක්ෂණය යයි කියනවා. ඇත්තටම පරිගණක විද්‍යාව හැදෑරු කෙනෙකු ඊළගට පිවිසෙන්නේ තොරතුරු තාක්ෂණ ලෝකයටයි.

ඉතින් මම මේක ලිව්වේ පරිගණක විද්‍යාව ලිපි පෙළට හොද ආරම්භයක් ලබා දෙන්නයි. ඔබට මේක වැදගත් වුණානම් කියන්න. ඉතින් ඉදිරියේදී තවත් හරවත් ලිපි පෙළකින්  නැවත හමු වෙමු.෴

“මෙම ලිපිය ශිරෝෂන් රන්දික< /b> විසින් ලියන ලද ලිපියකි. ඔහුගේ අවසරය මත උපුටාගැනීම් සිදු විය යුතුයි” ‍ Copyrights © 2010 Shiroshan Randika All rights Reserved.