ලෝක විනාශය (පළමු කොටස)

"සදාකාලික මරණය සියල්ලන්ටම උරුම වනු ඇත. කිසිවෙක් කිසිදාක නැවත නූපදිනු ඇත. ඔවුනොවුන් තමන්ට හිමි විමුක්තිය, සදාකාලික සැපත උරුම කරගනු ඇත."

රැස්ව සිටි පිරිස ජයඝෝෂා නැගූහ. ඔවුන්ට අවසානයේ විමුක්තිය ලැබෙනු ඇත.

"මෙතෙක් පොත්පත් වලින් හෝ මුඛ මාර්ගයෙන් පමණක් අසා දැක සිටියාවූත් යථාර්ථයක් ලෙස කිසිවකුටත් අවබෝධ කර ගැනීමට මෙකල්හි දී නොහැකි වූත් නිර්වාණය, විමුක්තිය උදාවනු ඇත." ජයඝෝෂාව වඩ වඩාත් තීව්‍ර වන්නට විය.

"මොනවද මේ මනුස්සය කියන්නේ?" ලියනාඩෝ අසල සිටි ෆ්‍රෑන්ක්ගෙන් ඇසීය.

"මිනිහා කියන එක විශ්වාස කරන්න සෑහෙන්න අමාරුයි." ෆ්‍රෑන්ක් තම නිවසේ සිට සැතපුම් දහස් ගණනක් ඈතින් වූ එක් පුංචි රටක වෙසෙන මිනිසෙකු දෙස බලමින් ඔහුගේ කතාවට සවන් දෙමින් තම මිතුරාට පැවසීය.

"විශ්වාස කරන්න අමාරුයි නෙවෙයි. කොහොමටවත් විහ්වාස කරන්න බැහැ" ලියනාඩෝ තම මිතුරා දෙස බලමින් පැවසීය.

"එහෙම කියන්න බැහැ ලියෝ. මිනිහා කියන කතාවේ සෑහෙන්න ලොකු ඇත්තක් තියෙනවා. මිනිහගේ සාක්ෂිත් සෑහෙන්න ප්‍රබලයි."

"අයිසේ ෆ්‍රෑන්ක් තමුසේ දන්නවනේ පිස්සෝ ගැන? තමන් කියන දේ ගැන තමන්ම දන්නේ නෑ. මේ ඉන්නේ ඒ වර්ගයේ කෙනෙක්."

නමුත් ලියෝ මිනිහ විද්‍යාඥයෙක්. දාර්ශනිකයෙක්. මේ මනුස්සයට තියෙන්නේ මහ පුදුමාකාර දැනුමක්. ඉතින් එහෙම කෙනෙක් පිස්සෙක් වෙන්නේ කොහොමද?"

"ෆ්‍රෑන්ක් දන්නවනේ නූගත් මිනිහෙක් වුනත් උගත් මිනිහෙක් වුනත් පිස්සෙක් වුනොත් ඒක භයානකයි. තමුසේ කියන විදියට මේ මිනිසා වගේ විද්‍යාඥයෙක් දාර්ශනිකයෙක් පිස්සෙක් වුනොත් අති භයංකරයි. ඒ මොකද මිනිහගේ දැනුම අති විශාලයි. ඒක නිසා ඒ දැනුම නුවමනා විදයට යොදවන්න පුවවන්. මට හිතෙන්නේ මේ මිනිහා කරන්නේ ඒ වගේ දෙයක්."

"මේ පහළ වෙලා ඉන්නේ මිනිස්සු මෙච්චර කාලයක් බලාපොරොත්තුවෙන් සිටි උත්තමයෙක්. අතීතයෙන් ලැබුණ පුවත්වල කියවුනු බුදුරජාණන් වහන්සේයි, අනිත් ආගමික නායකයොයි අපේ කාලයේ විදියට බැලුවොත් එක්තරා විදියක විශ්වාසයක් පමණයි. මොකද එතුමන්ලව සියැසින් දැකපු කිසි කෙනෙක් දැන් නැහැනේ. හැමෝම කියන්නේ ඉස්සර මේ වගේ අය හිටිය කියලා විතරයි. නමුත් මේ පුද්ගලයා නිසා ඒ විශ්වාසය යථාර්ථයක් බවට පත් වෙනවා." ෆ්‍රෑන්ක් පැවසුවේය.

"නමුත් මේ මනුස්සයගේ දර්ශනය ඒ ඔක්කොමටම වඩා හාත්පසින් වෙනස් නේද?"

"මට දැනට ලැබිල තියෙන තොරතුරුවලට අනුව නම් එහෙම තමයි. මේ පුද්ගලයා හමුවෙන්න පුළුවන්කමක් ලැබුනොත් නම් හරියටම සිද්ධිය දැන ගන්න පුළුවන්."

මිතුරන් දෙදෙනාගේ කථාව එතනින් නිමා විය. ෴

"ලෝක විනාශය" නම් වූ මෙම විද්‍යා ප්‍රබන්ධය පැතුම් අසංක හේරත්ගේ "පරිණාමයේ වේදනාව සහ වෙනත් කතා" ග්‍රන්ථයෙහි එන එක් කතාවකි. උපුටාගැනීම් සියල්ල ඔහුගේ අවසරය ඇතිව සිදු විණි. සේයාරුව LA Times වෙතිනි.